Evlərimizə və iş yerlərinə aldığımız qablaşdırılmış sular böyrəklərimiz üçün zərərli ola bilər. Sifariş etiyimiz suların harada qablaşdırıldığı və tərkibinə hansı maddələrin qatıldığı məlum deyil. Araşdırmalara görə, bir çox su şirkəti xarab olmaması üçün satdıqları suların tərkibinə xüsusi soda qatır. Bu isə böyrəyimizə çox ciddi ziyan vura bilər.

Nefroloq Taleh Nağdəliyev açıqlamasında bildirib ki, böyrəyi həssas olan insanlar içdikləri suyu mütləq laboratoriyadan keçirməlidirlər.

“Satılan suların tərkibində adətən minerallar çox olur. Böyrək xəstələrinə isə əlavə mineral qəbulu məsləhət deyil. Xəstə suyun tam mineral tərkibi olduğuna dəqiq əmindirsə, istifadə edə bilər. Çünki mineral sularda kalium var. Böyrək xəstələrinə isə kalium olmaz. Laboratiyadan keçirmədən suyun tərkibinin zərərli olduğunu demək də mümkün deyil”, - nefroloq deyib.

Azad İstehlakçılar Birliyinin sədri Eyyub Hüseynov isə bildirib ki, elm genetik səviyyədə orqanizmə hansı suyun lazım olduğunu hələ araşdırıb tapmayıb:


“Bu səbəbdən heç kəs deyə bilməz ki, baha qiymətə satılan qablaşdırılmış su birbaşa krantdan yığılır, yoxsa təmizlənmiş sudur. Ölkənin əmtəə bazarında litri 40 qəpikdən 10 manata qədər olan su var. Əgər suyun tərkibi H2O-dursa, nə üçün bu qədər qiymət fərqi var? Bütün bu məsələlər hamısı sual altındadır. 10 il əvvəl Azad İstehlakçılar Birliyi 12 suyun primitiv analizini apardı və nəticələri mətbuatla paylaşdıq. 1 həftə ərzində 3 şirkət tərəfindən məhkəməyə verildik”.

E.Hüseynovun sözlərinə görə, su filtirçiləri də vəziyyətdən xüsusi istifadə edirlər:

“Filtirçilər yalançı təcrübələr keçirirlər ki, guya içdiyimiz sular təhlükəlidir. Bu səbəbdən suyu təmizləyərək qablaşdırıb satan insanlar da hər cür yola əl atırlar. Çünki suyu gözlə görüb qoxlamaqla heç nəyi ayırd etmək olmur. Suya əlavə maddələrin, sodaların qarışdırılması məsələsinə AQTA nəzarət etməli, araşdırma aparmalıdır”.