Bu gün sevinməyə, fərəhlənməyə ən çox haqqı olanlar bizim qəhrəman qazilərimizdir. Həm Birinci, həm də İkinci Qarabağ savaşının iştirakçıları Vətən uğrunda canlarını sipər edib, qanlarını dərya etmişlər. Onlar döyüşdülər, yaralandılar, şəhid oldular, şəhid yoldaşlarına özlərini borclu bildilər və söz verdilər ki, qanı yerdə qalmayacaq. O gün gəldi və qələbənin sevincini bu igid insanlar yaşayır. Göylərə baxıb, şəhid qardaşlarının ruhuna sevincini göndərənlər məhz qazilərimizdir. Bu ölkə onlara, onların qucağında şəhid olmuş döyüş yoldaşlarına çox şey borcludur – ödənməyəcək qədər böyük bir borcdur.Bu gün, 8 Noyabr – Zəfər Günü, ən çox onların haqqıdır. Vətənini bütöv görmək, torpaqlarını azad görmək, xalqının qürurunu yaşamaq onların haqqıdır. Hər bir qazimizin sevinci fərqli ola bilər, amma bu gün onların sevinci, bütün xalqımızın qürurunu və xoşbəxtliyini ifadə edir.İkinci Qarabağ savaşının iştirakçısı, Azərbaycan Silahlı Qüvvələrinin zabiti və ictimai fəal İqbal Səfərov öz sevinci barədə deyir: “Son nöqtəni özümüzün təyin etdiyimiz yerdə qoymağın sevincini yaşayırıq. Necə də böyük qələbədir! Necə də böyük mutluluqdur!” Bu sözlər qazilərimizin qələbə sevincini, Vətən uğrunda göstərdikləri şücaəti əks etdirir.Ən güclü ordu belə, komandirin “İrəli!” əmri olmadan heç bir əməliyyata başlaya bilməz. Orduda tabeçilik və disiplin ən vacib amillərdir. Nizam-intizamı olmayan ordu heç vaxt müzəffər ola bilməz. Komandir isə böyük məsuliyyətin daşıyıcısıdır. Yanlış qərarlar vermək həm özünü, həm də ordunu uğursuzluğa sürükləyə bilər. Tarix bunun saysız nümunələri ilə doludur. Ali Baş Komandan isə bütün məsuliyyəti üzərinə götürməyi, soyuqqanlı, savadlı və cəsarətli olmağı bacarmalıdır. O, verdiyi qərarların arxasında dayanmalı, hər zaman ordusunu qələbəyə aparmalıdır.Yeni tarix məhz Ali Baş Komandanın adı ilə bağlıdır. Azad, müstəqil və bütöv Azərbaycan onun rəhbərliyi sayəsində quruldu. Belə xoşbəxtlik çox az sərkərdələrə və dövlət başçılarına nəsib olmuşdur. Ali Baş Komandanın öz sözləri ilə desək, o, ata nəsihətini yerinə yetirən ən xoşbəxt insandır.Tarixi Qələbə münasibəti ilə başda Müzəffər Azərbaycan Ordusunun Ali Baş Komandanını, tabeçiliyində olan bütün şəxsi heyəti və Azərbaycan xalqını səmimi qəlbdən təbrik edirik. Yenə də birlik göstərildi, bütün sahələrdə və cəbhələrdə düşmənə qarşı bir yumruq kimi birləşdik. Artıq dünya Azərbaycanı və ordumuzu tanıyır, bizimlə hesablaşır. Başımız uca, alnımız təmizdir. Biz sülhü seçdik, amma bu sülhün sərhədləri var idi və xalqımızın əzmi nəticə verdi.8 Noyabr – Zəfər Bayramı yalnız torpaqlarımızın azad edilməsi deyil, həm də xalqımızın birliyinin, iradəsinin və mübarizə ruhunun simvoludur. Şəhidlərimizin qəhrəmanlığı sayəsində biz azad Vətəndə yaşayırıq, qazilərimizin fədakarlığı isə hər birimizə ilham verir, azadlığın və müstəqilliyin qiymətini bir daha xatırladır.Bu gün, 8 Noyabr 2025-ci il tarixində, biz həm keçmişimizi yad edir, həm də gələcəyimiz üçün daha da güclü olmağı özümüzə və gələcək nəsillərə borc bilirik. Bu Zəfər, vətənpərvərlik ruhunu nəsillər boyunca yaşadacaq və hər bir azərbaycanlının qəlbində daim alov kimi yanacaq.
Zəfər Bayramımız mübarək olsun!
Qarabağ Azərbaycandır!
Var olsun Rəşadətli Azərbaycan Ordusu!
Yaşasın Müzəffər Ali Baş Komandan

Fidan Tağızadə
Xırdalan 2 saylı Körpələr evi Uşaq bağçasının müdiri