Özbəkistan Qarabağın kənd təsərrüfatı torpaqlarından istifadəyə maraq göstərir, bu da Azərbaycanla aqrar-sənaye sektorunda əməkdaşlığın dərinləşdirilməsi üçün perspektivli istiqamət kimi qiymətləndirilir.

"Report"un müxbirinin məlumatına görə, bu barədə Özbəkistan Ticarət-Sənaye Palatasının sədri Davron Vahabov Şuşada keçirilən İƏT-in altıncı biznes forumunun kuluarlarında jurnalistlərə bildirib.

"Burada (Qarabağda) münbit torpaq var və bu halda hər iki tərəfdən - həm Azərbaycan, həm də Özbəkistan tərəfindən maraq olacaq. Bundan əlavə, logistika xərcləri azalacaq. Hazırda Azərbaycan vasitəsilə Avropaya ixracımız var, lakin idxal həcmləri aşağıdır. Bu, malların gətirilməsi xərclərini artırır. Əgər biz tarazlaşdırılmış əmtəə dövriyyəsinə nail olsaq, sahibkarlar logistika xərclərini azaldacaqlar ki, bu da məhsulun maya dəyərinə müsbət təsir göstərəcək", - deyə o əlavə edib.

Vahabov qeyd edib ki, Azərbaycan rəhbərliyi bu sahədə birgə təşəbbüslərdə maraqlıdır.

"Biz KOBİA rəhbərliyi ilə danışdıq və təklif etdik: gəlin ayrıca iri fermerləri - təcrübəli, səriştəli olanları - gətirək ki, burada birgə layihə həyata keçirək. Məsələn, bərabər şərtlərlə: 50-yə 50. Özbəkistan investisiya qoyacaq, burada yetişdirilə bilən məhsulları - bizdə çatışmayan məhsulları təminatlı şəkildə alacaq", - deyə o qeyd edib.