“Azərşəkər” Məhdud Məsuliyyətli Cəmiyyətinin idarə heyətinin keçmiş sədri Anar Mehdiyev barəsində cinayət işi başlanıb və o, istintaqa cəlb edilib.

hedeftv.az məlumatına görə, Anar Mehdiyev təxminən 800 min manat məbləğində vəsaiti mənimsəməkdə ittiham olunur. Cinayət işi üzrə istintaq Azərbaycan Respublikasının Baş Prokuroru yanında Korrupsiyaya Qarşı Mübarizə Baş İdarəsi tərəfindən aparılır. Hazırda o, polis nəzarəti altına verilib.

Haqqin.az saytının məlumatlara görə, Anar Mehdiyev 2024-cü ilə qədər “Azərşəkər” MMC-nin idarə heyətinin sədri vəzifəsini tutub. Bu müddət ərzində müəssisənin maliyyə-təsərrüfat fəaliyyətində ciddi pozuntulara yol verildiyi ehtimal olunur. İstintaq materiallarında onun səlahiyyətlərindən sui-istifadə edərək böyük məbləğdə vəsaiti şəxsi maraqları naminə yönəltdiyi qeyd edilir.

Bu fakt bir daha göstərir ki, dövlət və yarıdövlət strukturlarında maliyyə nəzarətinin zəifliyi korrupsiya üçün münbit zəmin yaradır. Cinayət işi üzrə “Azərşəkər” MMC və “Dastan Agro” MMC zərərçəkmiş qismində tanınıb. Qeyd edək ki, Anar Mehdiyev eyni zamanda “Dastan Agro” MMC-nin qanuni nümayəndəsi kimi də çıxış edib. Hazırkı ittihamlar cinayət işinin yalnız ilkin mərhələsidir. Maliyyə sənədlərinin dərin təhlili aparıldıqdan sonra mənimsəmə məbləğinin artması, eləcə də digər epizodların üzə çıxması mümkündür.

Son illər Korrupsiyaya Qarşı Mübarizə Baş İdarəsi tərəfindən yüksək vəzifə tutmuş şəxslərlə bağlı başlanan cinayət işləri göstərir ki, toxunulmazlıq anlayışı artıq formal xarakter daşıyır. Anar Mehdiyevin işi də bu prosesin tərkib hissəsi kimi qiymətləndirilir.