12 dekabr Azərbaycan tarixinin ən duyğulu, həm də ən qürurlu günlərindən biridir. Bu gün Ümummilli Lider, müasir Azərbaycan dövlətinin qurucusu, xalqımızın böyük xilaskarı Heydər Əliyevin anım günüdür. Hər il bu tarixlə bağlı keçirilən tədbirlər, ehtiram mərasimləri və xatirə anları bir daha göstərir ki, Heydər Əliyev yalnız bir siyasi lider deyil, bir ideologiya, bir dövlətçilik məktəbi və bir millətin ruhudur. Onun şəxsiyyəti Azərbaycan xalqının taleyi ilə o qədər sıx bağlıdır ki, 12 dekabr təkcə anım günü deyil, həm də Azərbaycan dövlətçiliyinin möhkəmliyini təsdiqləyən bir milli sədaqət günüdür.Heydər Əliyev XX əsr Azərbaycan tarixinin ən böyük simasıdır. O, həm sovet dövründə, həm də müstəqillik illərində xalqı üçün misilsiz xidmətlər göstərmiş, respublikamızın inkişaf istiqamətini dəyişdirərək dövlətçiliyin bünövrəsini möhkəmləndirmişdir. Onun siyasi fəaliyyəti, idarəçilik qabiliyyəti, dövlətçilik fəlsəfəsi və insanlara olan dərin sevgisi bu gün də hər bir azərbaycanlı üçün örnəkdir.Sovet dövründə Azərbaycan SSR-ə rəhbərlik etdiyi illər respublikamızın inkişaf tarixinə “qızıl dövr” kimi daxil olmuşdur. Heydər Əliyev respublikada sənaye, kənd təsərrüfatı, elm və mədəniyyət sahələrinin inkişafına böyük töhfələr verdi. Azərbaycanın milli kadr potensialını artırmaq, milli özünüdərki gücləndirmək və respublikanın nüfuzunu qaldırmaq onun əsas məqsədləri idi. O dövrdə həyata keçirilən islahatlar Azərbaycan xalqının özünə inamını artırdı, ölkənin iqtisadi gücünü və sosial inkişafını təmin etdi.Lakin Heydər Əliyevin tarixi missiyasının həlledici mərhələsi müstəqillik illərində başladı. 1991-ci ildə müstəqilliyini yenicə bərpa etmiş Azərbaycan ağır sınaqlarla üz-üzə idi. Hərbi təcavüz, separatizm, daxili siyasi çəkişmələr və ictimai-sosial böhran ölkəni parçalanma həddinə gətirmişdi. Belə bir vəziyyətdə xalqın təkidli çağırışı ilə 1993-cü ildə hakimiyyətə qayıdan Heydər Əliyev Azərbaycan üçün xilaskar missiyasını yüksək məsuliyyətlə yerinə yetirdi. O, vətəndaş qarşıdurmasına son qoydu, dövlət çevrilişi cəhdlərini zərərsizləşdirdi, dövlət institutlarını bərpa etdi və ölkəni sabitlik yoluna çıxardı.Ulu Öndərin qətiyyətli siyasəti sayəsində ölkədə sabitlik təmin olundu, iqtisadi islahatlar başlandı və Azərbaycanın beynəlxalq aləmdə mövqeyi möhkəmləndi. Xüsusilə 1994-cü ildə imzalanan “Əsrin müqaviləsi” Azərbaycan tarixinin dönüş nöqtəsi oldu. Bu müqavilə Azərbaycanın iqtisadi müstəqilliyini təmin etdi, ölkəyə böyük sərmayələrin axınını başlatdı və Azərbaycanı regionun enerji mərkəzinə çevirdi. Heydər Əliyevin yaratdığı neft strategiyası bu gün də dövlətimizin iqtisadi qüdrətinin əsasını təşkil edir.Heydər Əliyevin ən böyük amal və ideyalarından biri isə azərbaycançılıq fəlsəfəsidir. O, milli birliyi, dövlətə sədaqəti, vətənə sevgini, tolerant və humanist dəyərləri bu ideologiyanın mərkəzinə qoydu. Bu gün Azərbaycanda hökm sürən milli həmrəylik, güclü dövlətçilik düşüncəsi və xalq-dövlət birliyi məhz Heydər Əliyevin yaratdığı bu ideyanın bəhrəsidir.Ulu Öndər hər zaman xalqına güvənirdi. Onun “Xalq mənim dayağımdır” sözləri siyasi fəlsəfəsinin mahiyyətini tam şəkildə açıqlayırdı. O, xalqa arxalanır, xalq da ona inanırdı. Bu qarşılıqlı inam sayəsində Azərbaycanın gələcək inkişafına doğru inamlı addımlar atıldı. Məhz bu əlaqə Heydər Əliyevi xalqın Ümummilli Liderinə çevirdi.Bu gün Heydər Əliyevin siyasi kursu ölkə başçısı, Müzəffər Ali Baş Komandan cənab İlham Əliyev tərəfindən uğurla davam etdirilir. Müstəqil Azərbaycan dövlətinin hər bir uğuru Heydər Əliyevin uzaqgörən strategiyasının davamının təcəssümüdür. Xüsusilə 44 günlük Vətən müharibəsində əldə olunan möhtəşəm Qələbə Ulu Öndərin dövlətçilik irsinin gücünü bir daha nümayiş etdirdi. Ordunun güclənməsi, milli birlik, dövlətin qüdrəti – bunların hər biri Heydər Əliyevin yaratdığı möhkəm təməllərin nəticəsidir.12 dekabr yalnız bir xatirə günü deyil, həm də dövlətçilik dərsi, milli irsə sədaqət və gələcəyə inam günüdür. Hər bir azərbaycanlı üçün bu gün Ulu Öndərin əziz xatirəsinə ehtiramın, onun ideyalarına sədaqətin simvoludur. Onun yaratdığı müstəqil Azərbaycan dövləti öz inkişafını davam etdirir və Ulu Öndərin arzuları bir-bir həyata keçir.Heydər Əliyevin ruhu bu gün də Azərbaycan xalqını birləşdirən, ona güc verən böyük bir işıqdır.Allah rəhmət eləsin. Ulu Öndərin əziz xatirəsi xalqımızın qəlbində əbədi yaşayacaq.
Bayramov Yelman Lətif oğlu
Göygöl rayonu Topalhəsənli bələdiyyəsinin sədri.