12 dekabr Azərbaycan xalqının qəlbində xüsusi ehtiramla, dərin hörmət və minnətdarlıqla anılan bir gündür. Bu gün Ümummilli Lider Heydər Əliyevin anım günüdür – xalqımızın taleyində dönüş yaradan, müasir Azərbaycanın siyasi, iqtisadi və mənəvi dirçəlişinin banisi olan böyük dövlət xadiminin xatirəsinin yad edildiyi gün. Heydər Əliyevin Azərbaycan tarixində tutduğu yer misilsizdir. O, yalnız bir siyasi lider kimi deyil, həm də xalqının xilaskarı, milli ideologiyanın formalaşdırıcısı, dövlətçilik ənənələrinin yenidən bərpaçısı kimi əbədi olaraq yaddaşlara həkk olunmuş şəxsiyyətdir.
Ulu Öndər Heydər Əliyevin fəaliyyəti bütöv bir epoxanı əhatə edən nəhəng bir rəhbərlik məktəbidir. Onun Azərbaycana rəhbərlik etdiyi hər iki dövr tariximizin ən çətin, ən məsuliyyətli mərhələləri olmuşdur. 1969-cu ildə respublikanın rəhbərliyinə gələn Heydər Əliyev qısa müddətdə Azərbaycanı gerilikdən çıxararaq inkişaf yoluna salmış, sənaye, kənd təsərrüfatı, elm, təhsil, mədəniyyət sahələrində böyük nailiyyətlər əldə etmişdi. Həmin illər Azərbaycan tarixində "intibah dövrü" kimi qəbul edilir. Bu inkişafın mərkəzində isə hər zaman insan amili, xalq rifahı dayanırdı.
1990-cı illərin əvvəllərində ölkəmizin üzləşdiyi ağır sınaqlar, dövlətçiliyin dağılmaq təhlükəsi, separatizm, iqtisadi tənəzzül xalqı çıxılmaz vəziyyətə salmışdı. Məhz belə bir zamanda xalqın təkidli tələbi ilə hakimiyyətə qayıdan Heydər Əliyev Azərbaycanı bəlalardan xilas etdi. Onun müdrik siyasəti, ardıcıl və qətiyyətli addımları sayəsində ölkədə sabitlik bərpa olundu, dövlət strukturları yenidən quruldu, nizami ordu formalaşdırıldı, Azərbaycanın beynəlxalq nüfuzu yüksəldi. 1994-cü ildə imzalanan "Əsrin müqaviləsi" isə Azərbaycanın gələcək iqtisadi inkişafının əsasını qoydu və ölkəmizi beynəlxalq enerji xəritəsində strateji mövqeyə gətirdi.
Heydər Əliyev həm də milli ideologiyanın formalaşmasının memarıdır. Onun əsasını qoyduğu dövlətçilik konsepsiyası – müstəqillik, milli birlik, inkişaf, güclü ordu, güclü iqtisadiyyat və dünya ilə bərabərhüquqlu əməkdaşlıq – bu gün də Azərbaycanın siyasi kursunun ideoloji əsasını təşkil edir. Ulu Öndərin bütün fəaliyyəti Azərbaycanın güclənməsinə, xalqın rifahının yaxşılaşmasına, ölkəmizin regionda və dünyada nüfuzunun artmasına xidmət edib. Onun xarici siyasət xətti Azərbaycanı beynəlxalq aləmdə etibarlı tərəfdaş, regional lider kimi tanıdıb.
Heydər Əliyevin ən böyük uğurlarından biri də bu gün Azərbaycanı qətiyyətlə irəli aparan siyasi varislik xəttini yaratmasıdır. Onun müdrik siyasəti Prezident İlham Əliyev tərəfindən uğurla davam etdirilir. Bu gün Azərbaycanın iqtisadi yüksəlişi, ordu quruculuğu, sosial islahatları, beynəlxalq miqyasda artan nüfuzu Ulu Öndərin təməlini qoyduğu inkişaf strategiyasının məntiqi nəticəsidir. Müzəffər Ali Baş Komandan İlham Əliyevin rəhbərliyi ilə Azərbaycan torpaqlarının azad edilməsi də məhz Heydər Əliyevin yaratdığı ideoloji gücün, dövlətçilik irsinin davamıdır.
12 dekabr – bu böyük şəxsiyyətin xatirəsinin yad edilməsi ilə yanaşı, onun Azərbaycan üçün etdiklərinin dərk edildiyi gündür. Bu gün Ulu Öndərin göstərdiyi yolla addımlamağın, onun ideyalarını yaşatmağın vacibliyi bir daha vurğulanır. Xalqımız Heydər Əliyevi hər zaman ehtiramla anır, onun siyasi irsinə sədaqətlə sahib çıxır. Çünki Heydər Əliyev yalnız bir dövrün lideri deyil, həm də müstəqil Azərbaycan dövlətinin əbədi memarı, milli qürur mənbəyidir.
Bu səbəbdən 12 dekabr təkcə anım günü deyil, həm də milli birlik, vətən sevgisi və dövlətçilik məfkurəsinin yenidən dərk olunduğu gün kimi əhəmiyyət kəsb edir. Ulu Öndərin ömür yolu, dövlətçilik fəlsəfəsi və Azərbaycan naminə göstərdiyi misilsiz xidmətlər həm bu günün, həm də gələcək nəsillərin yolunda işıq saçmağa davam edir.
İsgəndər həkim