Azərbaycanın müasir dövlətçilik tarixində Prezident, Müzəffər Ali Baş Komandan cənab İlham Əliyevin adı xüsusi yer tutur. Onun rəhbərliyi ilə ölkəmiz mürəkkəb və məsuliyyətli mərhələlərdən keçərək güclü, qalib və söz sahibi olan bir dövlətə çevrilib. İlham Əliyev yalnız dövlət başçısı deyil, eyni zamanda xalqın taleyinə, milli maraqlara və tarixi ədalətə məsuliyyətlə yanaşan Lider kimi tanınır.
Ulu Öndər Heydər Əliyevin siyasi məktəbinin layiqli davamçısı olan İlham Əliyev 2003-cü ildə Azərbaycan xalqının etimadı ilə Prezident seçilərkən “Mən hər bir azərbaycanlının Prezidenti olacağam” bəyanatı ilə öz fəaliyyətinin əsas prinsipini ortaya qoydu. Bu prinsip sonrakı illərdə real siyasətdə, düşünülmüş qərarlarda və konkret nəticələrdə öz əksini tapdı. Onun rəhbərliyi dövründə ölkədə sabitlik möhkəmləndi, dövlət idarəçiliyi təkmilləşdi, iqtisadiyyat dayanıqlı inkişaf yoluna qədəm qoydu.
Prezident İlham Əliyevin dövlətçilik strategiyasında güclü ordu quruculuğu əsas prioritetlərdən biri olub. Müasir silahlarla təchiz edilmiş, yüksək peşəkarlığa malik Azərbaycan Ordusu məhz bu siyasətin nəticəsində regionun ən güclü ordularından birinə çevrildi. Bu güc və hazırlıq 2020-ci ildə Vətən müharibəsində öz tarixi bəhrəsini verdi. Müzəffər Ali Baş Komandanın qətiyyətli rəhbərliyi ilə Azərbaycan Ordusu 44 gün ərzində 30 illik işğala son qoydu, ərazi bütövlüyümüzü bərpa etdi.
Qarabağ Zəfəri Prezident İlham Əliyevin liderlik iradəsinin, siyasi uzaqgörənliyinin və xalq–ordu–lider birliyinin parlaq təzahürü oldu. Bu Qələbə təkcə hərbi uğur deyil, həm də milli ləyaqətin, tarixi ədalətin və dövlət suverenliyinin bərpası idi. 8 Noyabr – Zəfər Günü artıq Azərbaycan xalqının qürur simvoluna çevrilib və bu tarixin müəllifi məhz İlham Əliyevdir.
Müharibədən sonrakı dövrdə Prezident İlham Əliyev qarşıya yeni və daha məsuliyyətli vəzifələr qoydu. Azad edilmiş Qarabağ və Şərqi Zəngəzur torpaqlarında genişmiqyaslı bərpa və quruculuq işləri başladı. Yeni yollar, hava limanları, yaşayış kompleksləri, məktəblər və xəstəxanalar inşa olunur. “Ağıllı şəhər” və “ağıllı kənd” layihələri regionun müasir və dayanıqlı inkişafını təmin edir. “Böyük Qayıdış” proqramı isə Prezidentin strateji baxışının real nəticəsidir.
Prezident İlham Əliyevin fəaliyyətində sosial siyasət və insan amili mühüm yer tutur. Şəhid ailələri, qazilər, müharibə iştirakçıları və sosial həssas qruplar daim dövlət qayğısı ilə əhatə olunub. Onların rifahının yaxşılaşdırılması, mənzil və sosial təminat məsələlərinin həlli dövlət başçısının xüsusi diqqət mərkəzindədir. Bu, Prezidentin xalqına olan səmimi münasibətinin və mənəvi məsuliyyətinin göstəricisidir.
Beynəlxalq arenada İlham Əliyev Azərbaycanın milli maraqlarını qətiyyətlə müdafiə edən, prinsipial mövqeyi ilə seçilən Lider kimi tanınır. Onun uğurlu xarici siyasəti nəticəsində Azərbaycan regional və qlobal proseslərdə etibarlı tərəfdaş, söz sahibi olan dövlətə çevrilib. Prezidentin beynəlxalq tribunalarda sərgilədiyi qətiyyətli mövqe, diplomatik çeviklik və siyasi cəsarət ölkəmizin nüfuzunu xeyli artırıb.
Bu gün Azərbaycan xalqı Prezident İlham Əliyevlə fəxr edir. O, qalib ordunun Sərkərdəsi, güclü dövlətin rəhbəri, milli birliyin və gələcəyə inamın rəmzidir. İlham Əliyevin rəhbərliyi ilə Azərbaycan inamla irəliləyir, müstəqil siyasətini qoruyur və daha böyük uğurlara doğru qətiyyətlə addımlayır. Onun adı müasir Azərbaycanın Zəfər salnaməsinə əbədi olaraq həkk olunub.
Möhtərəm cənab Prezident İlham Əliyevi 64 yaşı münasibətilə səmimi-qəlbdən təbrik edirik. Sizin uzaqgörən siyasətiniz və sarsılmaz iradəniz Azərbaycanı qalib, güclü və nüfuzlu dövlətə çevirib. Sizə möhkəm cansağlığı, uzun ömür, ailə səadəti və dövlətçilik yolunda yeni tarixi uğurlar arzulayırıq.

Bayramov Yelman Lətif oglu Göygöl rayonu Topalhəsənli bələdiyyəsinin sədri