Katibə, adətən, ofis mühitində idarəetmə və təşkilati dəstək göstərən bir işçidir. Müəssisənin gündəlik işlərinin düzgün və effektiv bir şəkildə aparılmasına kömək edən katibənin əsas vəzifəsi idarəçilik və rəhbərlik heyətinin iş yükünü azaltmaq və ofisin gündəlik işlərinin problemsiz bir şəkildə davam etdirilməsini təmin etməkdir. Onlar telefon zənglərini cavablandırır, korrespondensiya ilə məşğul olur, məlumatları toplayıb düzəldir, hesabatlar hazırlayır və iclaslar üçün sənədləşdirilmə işlərini görürlər. Katibənin müxtəlif insanlarla ünsiyyət qurmaq və effektiv şəkildə kommunikasiya aparmaq bacarığı olmalıdır.

Kişilər katib vəzifəsi onlara yalnız yüksək maaşlı dövlət qurumlarında təklif olunanda işləyirlər. Ona görə də belə stereotip yaranıb ki, katibəlik məxsusi olaraq məhz qadınlar üçündür. Ancaq rəhbər vəzifəli şəxsin kişi xeylağı olduğu təqdirdə onun katibə ilə münasibətinə dair dedi-qoduların da yayılması ehtimalı az deyil. Təəssüf ki, bəzən həmin şayiələrin yayılmasının təşəbbüskarları məhz katibələr özləri, onların tamahı, əlavə imtiyaz və qazanc əldə etmək məqsədləri olur.

Regiontv.info xəbər portalında “19 saylı Yol İdarəsinin müdiri Nazim Eynallı ilə bağlı şok iddia – Katibəsi ilə cinsi...” adlı məqalə dərc olunmuşdu. Qeyd olunan məqalədə Zümrüd Atakişiyeva tərəfindən yayılmış məlumatı şər, böhtan hesab edən Nazim Eynallının hüquqi nümayəndəsi Regiontv.info xəbər portalının rəhbərliyinə ərizə ilə müraciət edərək, sözügedən məqalənin həqiqətə uyğun olmadığı üçün xəbər portalından çıxarılmasını xahiş etmişdir.

Ərizədə xatırladılmışdır ki, Zümrüd Atakişiyevanın cavabdeh Eynallı Nazim Hüseyn oğluna qarşı verdiyi atalıq faktının müəyyən edilməsi və aliment tələbi barədə iddiası əsassız sayılaraq Şamaxı rayon məhkəməsinin 2(074)-25/2025 saylı, 21.02.2025-ci il tarixli qətnaməsilə rədd edilmişdir. Bundan sonra eyni məhkəmənin 1(074)-11/2025 saylı, 05.06.2025-ci il tarixli hökmü ilə Atakişiyeva Zümrüd Arif qızı Azərbaycan Respublikası Cinayət Məcəlləsinin 147.2-ci maddəsində nəzərdə tutulmuş cinayət əməlini törətməkdə təqsirli bilinərək, aylıq qazancının 5 (beş) faizi dövlət nəfinə tutulmaqla, 8 (səkkiz) ay müddətinə islah işləri cəzasına məhkum edilmişdir.

Şahin Orucov