Əmək və Əhalinin Sosial Müdafiəsi Nazirliyi Dövlət Tibbi-Sosial Ekspertiza və Reabilitasiya Agentliyinin Lənkəran Reabilitasiya Mərkəzi Lənkəran şəhərində və ətraf rayonlarda yaşayan əlilliyi olan şəxslərə kompleks tibbi, sosial-psixoloji reabilitasiya xidməti göstərmək yolu ilə onların sosial statusunun bərpa edilməsi və cəmiyyətə inteqrasiyası, onların tibbi, sosial-psixoloji, peşə diaqnostikası və reabilitasiyası, xəstəlikləri nəzərə alınmaqla dietik və rasional qidalanmasının təşkili, yaş və sağlamlıqlarını nəzərə alınmaqla mədəni-kütləvi tədbirlərə, müalicə idmanına cəlb edilməsi, onlarda gigiyenik vərdişlərin tərbiyə edilməsi, sağlam həyat tərzinin təbliği istiqamətində işlər görür.

2020-ci ildə istifadəyə verilən müəssisədə Lənkəran, Astara, Lerik, Masallı, Yardımlı, Cəlilabad və Biləsuvar rayonları üzrə il ərzində 350 əlilliyi olan şəxsə effektiv fizioterapevtik üsulların tətbiqi əsasında tibbi-sosial reabilitasiya xidmətləri göstərilir. Mərkəz limfodrenaj, ozonoterapiya, maqnitoterapiya, hidroterapiya və digər yeni müasir tibbi-reabilitasiya aparatları və avadanlıqlarla da təchiz edilib.
Pasientlər Mərkəzdə göstərilən xidmətdən razılıq edirlər. Bu günlərdə redaksiyamıza müraciət edən 1988-ci il təvəllüdlü II dərəcəli əlil Nəzərov Rüfət Rahab oğlu xidmətindən istifadə etdiyi Lənkəran Reabilitasiya Mərkəzinin kollektivinə ünvanaldığı minnətdarlıq nidalarını ictimailəşdirməyi xahiş etmişdir:

“Mən keçirilmiş uşaq serebrel iflicinin qalıqlarının əlamətləri olaraq aşağı ətraflarımın paraparezi, yeriş və duruş funksiyamın pozulmasından şikayətliyəm. Mütəmadi müalicə alıram. Axırıncı dəfə iyul ayının 1-dən 14-ə kimi Mərkəzdə müalicədə olmuşam. Maqnioterapiya, vakkum elektroterapiya, elektromiostimulyasiya, massaj və başqa prosedurlar alandan sonra hissi və hərəki funksiyalarım yaxşılaşıb. Əlbəttə ki, bu cür şəraitin yaradıldığına, əlilliyi olan vətəndaşların heç bir xərc çəkmədən əlinin belə yüksək, keyfiyyətli xidmətlərə çatdığına görə dövlətimizin başçısı cənab İlham Əliyevə, sosial məsələlərdə hökumətə etibarlı tərəf müqabili kimi çıxış edən Heydər Əliyev Fondunun Prezidenti Mehriban xanım Əliyevaya minnətdarlığımı bildirirəm. Əlbəttə ki, dövlətimizin diqqətcil və qayğılı münasibətini vətəndaşlara ötürməklə vəzifələndirilmiş Əmək və Əhalinin Sosial Müdafiəsi Nazirliyinə, Lənkəran Reabilitasiya Mərkəzinin direktoru doktor Elvin Əsədullazadəyə, müalicə həkimim Nairə Həşimovaya və mənim səhhət durumuma həssas münasibət göstərən digər kollektiv üzvlərinə təşəkkürümü çatdırıram”.

Hazırladı: Şahin Orucov