Rusiyanın Sverdlovsk vilayətində həkimlər tibb tarixində nadir hallarda rast gəlinən əməliyyata imza atıblar.

hedeftv.az xəbər verir ki, yerli klinikada 50 yaşlı kişinin qarın boşluğundan təxminən 60 kiloqram ağırlığında nəhəng şiş uğurla çıxarılıb.

Məlumata görə, söhbət liposarkomadan gedir. Şiş təxminən 20 il ərzində xəstənin bədənində tədricən böyüyüb və uzun müddət aşkar olunmayıb. Vaxt keçdikcə şiş aşağı boş venaya ciddi təzyiq göstərib, bağırsaqları, sidik kisəsini və digər daxili orqanları isə tamamilə yerindən oynadıb.

Həyat üçün son dərəcə riskli olan əməliyyat demək olar ki, 8 saat davam edib. Prosesə 8 nəfərlik ixtisaslaşmış həkim briqadası cəlb olunub. Cərrahların peşəkarlığı sayəsində əməliyyat uğurla başa çatıb.

Hazırda xəstənin vəziyyəti stabildir, o, sağalma mərhələsinə keçib və həkimlərin nəzarəti altındadır.

Qeyd edək ki, liposarkoma orqanların daxilində deyil, onların ətrafındakı piy toxumasından inkişaf edən nadir bədxassəli şiş növüdür. Məhz bu səbəbdən onun erkən mərhələdə aşkarlanması son dərəcə çətin sayılır.