2021-ci ilin aprel ayında Dövlət Təhlükəsizliyi Xidməti (DTX) tərəfindən keçirilən əməliyyatla həbs olunan, barəsində Cinayət Məcəlləsinin 179.4 (mənimsəmə), 193-1.3.2 (cinayət yolu ilə əldə edilmiş pul vəsaitlərini leqallaşdırma), 308.2 (vəzifə səlahiyyətlərindən sui-istifadə), 311.3.2 və 311.3.3-cü (təkrar, külli miqdarda rüşvət alma) maddələri ilə ittiham elan edilən, 10 milyonluq əmlakı üzərinə həbs qoyulan, Gəncə Ağır Cinayətlər Məhkəməsinin hökmünə əsasən 11 il 6 ay müddətinə azadlıqdan məhrum edilən, nəhayətdə cəzası 1 il endirilərək 10 il 6 ay təyin olunan Şəmkir rayon İcra Hakimiyyətinin sabiq başçısı Alimpaşa Məmmədovdan miras qalan problemlər hələ də ətalət qüvvəsi ilə qalmaqdadır. Həmin problemlərdən biri də rayonun Xuluf (keçmiş Aşçağı Keçili) kənd sakinlərini narahat etməkdədir.

Belə ki, Xuluf kənd Rövşən İsmayılov adına 2 saylı məktəbinin stadionunu da sən demə, sabiq icra başçısı satıbmış. Şəmkir sakinlərindən hazırda Gəncədə yaşayan Əsgərov Binnət Şahvələd oğluna. Gəncə dəmiryol polisində mayor rütbəsində vəzifə tutmuş, hazırda təqaüddə olan Binnət Əsgərov indi hərəkətə keçərək, stadionu da, onun ətrafında Vətən mühariubəsi şəhidləri üçün kənd sakinlərinin daxili imkanları hesabına salınmış parkın, inşa edilmiş bulağın və əkilmiş ağacların yerini də bölüb fərdi ev tikmək istəyənlərə satmağa cəhd göstərir. Əlində guya qanuni sənədlər olduğunu deyən Binnət Əsgərov heç kəsə o sənədləri göstərmir. Guya torpaq sahəsini alanda götürdüyü boircu hələ verə bilməyib deyə sahəni bölüb satmaq istəyir. Onun əgər başqa borcu varsa, kənddəki evini və xurma bağını satıb ödəyə bilər.

Kənd sakinləri Əsgərov Kamran Nadir oğlu (tel.№ və digərləri kəndin uşaq və gənclərinin stadiondan məhrum olmasını yolverilməz hesab edirlər, Şəhidlər Parkına kiminsə şəxsi marağına qurban getməsini isə ümumiyyətlə şəhidlərin ruhuna hörmətsizlik sayırlar. Deyirlər ki, Binnət dəfələrlə buna cəhd edib, sakinlərin müqaviməti ilə qarşılaşıb. İstisna deyil ki, belə cəhdlərindən birində insident baş versin. Odur ki, aidiyyəti qurumlarımn müdaxiləsi vacibdir.

Baş redaktor: Şahin Orucov