12 dekabr Azərbaycan xalqı üçün yalnız bir tarix deyil, milli yaddaşın, dövlətçilik düşüncəsinin və Vətənə sevginin ən ali ifadəsidir. Bu gün müasir Azərbaycanın memarı, Ulu Öndər Heydər Əliyevin anım günüdür. Onun həyatı, fəaliyyəti və uzaqgörən siyasəti Azərbaycan tarixində silinməz izlər buraxmış, ölkəmizin inkişaf yolunu müəyyən etmişdir. Heydər Əliyev xalqı üçün yaşamaq, çalışmaq və mübarizə aparmaq ideyasının ən parlaq nümunəsi kimi yaddaşlarda əbədiləşmişdir.
Heydər Əliyevin dövlətçilik fəlsəfəsi hər şeydən əvvəl güclü, müstəqil, öz sözünü deyə bilən Azərbaycan ideyasına əsaslanırdı. O, siyasətdə də, ictimai həyatda da millətin maraqlarını hər zaman yüksəkdə tuturdu. XX əsrin çətin və qarışıq dönəmlərində Azərbaycanın xilaskarı kimi meydana çıxan Heydər Əliyev qısa müddətdə ölkədə sabitlik yaratmağa, dövlət institutlarını bərpa etməyə, xalqın itirilmiş ümidlərini yenidən qaytarmağa nail oldu. Bu böyük şəxsiyyətin rəhbərliyi altında Azərbaycan həm daxili sabitliyə, həm də beynəlxalq arenada nüfuzlu mövqeyə qovuşdu.
1993-cü ildə xalqın tələbi ilə hakimiyyətə qayıdan Heydər Əliyev Azərbaycanı dağılmaq təhlükəsindən qurtardı. Onun həyata keçirdiyi islahatlar, milli həmrəyliyi təmin edən siyasəti və ordunun formalaşdırılmasına göstərdiyi xüsusi diqqət dövlətin möhkəmlənməsi üçün həlledici rol oynadı. Ulu Öndərin ən böyük xidmətlərindən biri Azərbaycançılıq ideologiyasını dövlət siyasətinin əsas prinsipinə çevirməsi idi. Bu ideologiya bu gün xalqımızın milli birliyinin, dövlətçiliyimizin ideya əsasının təməlini təşkil edir.
Heydər Əliyev hər zaman insan amilini ön planda tutan lider kimi tanınıb. Onun siyasətində sosial rifah, təhsil və mədəniyyətin inkişafı xüsusi yer tuturdu. Gənclər siyasəti Heydər Əliyevin ən uğurlu istiqamətlərindən biri olmuş, o, ölkənin gələcəyini savadlı, vətənpərvər və yenilikçi gənclərin formalaşdırılmasında görürdü. Bu baxış bu gün Prezident cənab İlham Əliyev tərəfindən uğurla davam etdirilir. Ulu Öndərin yaratdığı güclü dövlət modeli müasir Azərbaycanın inkişaf konsepsiyasının ideoloji əsasını təşkil edir.
Heydər Əliyevin neft strategiyası isə XXI əsr Azərbaycanının iqtisadi inkişafının ana xətti oldu. “Əsrin müqaviləsi” kimi tarixə düşən neft sənayesi layihəsi Azərbaycanı dünya enerji xəritəsində mühüm aktora çevirdi və ölkəyə böyük iqtisadi dividendlər gətirdi. Bu strategiya sayəsində ölkəmizin iqtisadi müstəqilliyi təmin edildi, sosial-iqtisadi islahatların həyata keçirilməsi üçün geniş imkanlar açıldı.
Ulu Öndərin rəhbərliyi ilə qəbul edilən Konstitusiya, dövlət institutlarının formalaşdırılması, hüquqi islahatlar, beynəlxalq tərəfdaşlıqlar Azərbaycan Respublikasının uzunmüddətli inkişafının ideoloji, hüquqi və siyasi bazasını yaratdı. Məhz bu möhkəm təməlin üzərində Prezident İlham Əliyev müasir Azərbaycanın qarşısında duran tarixi və strateji vəzifələri uğurla həyata keçirir. Bu gün dünyada öz sözünü deyən, regionda lider mövqeyə malik, hərbi-siyasi gücünü təsdiq etmiş, tarixi Zəfərini qazanmış Azərbaycan Heydər Əliyev dühasının parlaq nəticəsidir.
Ulu Öndər Heydər Əliyevin anım günü həm də bir vəfa borcu, milli minnətdarlığın ifadəsidir. Hər il bu tarixdə insanlar onun xatirəsini ehtiramla yad edir, Vətənə xidmət nümunəsindən ilham alırlar. Heydər Əliyevin başladığı müqəddəs dövlətçilik yolu bu gün də yaşayır, inkişaf edir və nəsilləri Vətənə, millətə, dövlətə xidmət ruhunda birləşdirir.
12 dekabr bizə bir daha xatırladır ki, Heydər Əliyev yalnız bir lider, siyasətçi və dövlət xadimi deyil, həm də tarixi taleyimizi dəyişən böyük şəxsiyyət, azərbaycançılığın ideya banisi, milli varlığımızın dayağıdır. Onun ideyaları, amalları və ölkəmizə bəxş etdiyi inkişaf modeli bu gün də aktualdır və gələcək nəsillərin yolunu işıqlandırır.
Ulu Öndərin əziz xatirəsi hər zaman qəlbimizdə yaşayır və xalqın yaddaşında daim uca tutulacaqdır.
Tagizade Fidan
Xirdalan 2 sayli uşaq bagcasinin mudiri