Kimyəvi təmizləmə sektorunda uzun illərdir tətbiq edilən, lakin ev istifadəçilərinin son dövrlər diqqətini çəkən sadə bir detalın arxasında ciddi texniki səbəblər dayanır. Söhbət sənaye tipli yuma maşınlarında tenis toplarından istifadə edilməsindən gedir.

hedeftv.az xəbər verir ki, mütəxəssislərin izahına görə, bu üsul təsadüfi vərdiş deyil və tamamilə fizika qanunlarına əsaslanır. Kimyəvi təmizləmə maşınlarının baraban həcmi ev tipli paltaryuyanlardan xeyli böyükdür. Bu isə xüsusilə gödəkçə, palto, yorğan və içlikli məhsullar yuyularkən ciddi risk yaradır: içliyin bir yerə yığılması və yapışması.

Məhz bu nöqtədə tenis topları işə düşür. Baraban fırlandıqca toplar parçaların arasına daxil olaraq içlikləri mexaniki şəkildə açır, lələk və liflərin bir nöqtədə toplanmasının qarşısını alır. Eyni zamanda suyun və təmizləyici məhlulun parçaya bərabər yayılmasını təmin edir və yuma-sıxma zamanı məhsulun formasını qoruyur.

Kimyəvi təmizləmə müəssisələri üçün əsas problemlərdən biri müştəriyə təhvil verilən məhsulun həcmini itirməsidir. Tenis toplarının istifadəsi bu riski minimuma endirir. Nəticədə şişmə gödəkçələr sönük görünmür, yorğan və yastıqlar qabarıqlığını saxlayır, ütüləmə və son hazırlıq prosesi xeyli qısalır.

Mütəxəssislər bildirirlər ki, eyni fiziki prinsip ev tipli paltaryuyan maşınlarda da keçərlidir. Tenis topları çamaşırların bir-birinə yapışmasının qarşısını alır, yuyucu vasitənin liflərə daha yaxşı nüfuz etməsinə şərait yaradır. Bu isə geyimlərin daha yumşaq və həcmli çıxmasına səbəb olur.

Bununla belə, kimyəvi təmizləmə ustaları tenis topundan hər parça üçün istifadə etmir. Xüsusilə ipək və kəşmir kimi incə materiallarda mexaniki təsiri minimum olan xüsusi proqramlara üstünlük verilir.

Mütəxəssislər tenis topunun seçilmə səbəblərini də açıqlayıblar. Bu toplar kifayət qədər yüngüldür, barabanın daxili səthinə zərər vermir, elastik quruluşu sayəsində parçanı köhnəltmir və sərt, lakin kəsici olmayan səthə malikdir.

Sadə görünən bu üsul bahalı kimyəvi maddələrə və əlavə proqramlara ehtiyac olmadan yuma prosesinin səmərəliliyini artıran ən effektiv vasitələrdən biri hesab olunur.