Estoniya, Latviya və Litva heç vaxt ərazilərinin və hava məkanının Rusiyadakı hədəflərə qarşı dron hücumları üçün istifadəsinə icazə verməyib.

hedeftv.az xəbər verir ki, bununla bağlı Estoniya xarici işlər naziri Marqus Tsahkna, Latviya xarici işlər naziri Baiba Braze və Litva xarici işlər naziri Kestutis Budris birgə bəyanat yayıb.
Birgə yazılı açıqlamada Rusiyanın Baltikyanı ölkələri hədəf alan davam edən dezinformasiya kampaniyasının tamamilə əsassız olduğu bildirilib.

Bəyanatda Baltikyanı ölkələrinin bu iddiaları rəsmi olaraq təkzib etməklə yanaşı, bu mövqelərini rəsmi olaraq ölkələrindəki Rusiya diplomatik nümayəndəliklərinə çatdırıldığı qeyd olunub: "Rəsmi cavaba baxmayaraq, Rusiya yalanlarını davam etdirir. Ukrayna BMT Nizamnaməsinin 51-ci maddəsinə uyğun olaraq Rusiyanın hərtərəfli təcavüzkar müharibəsinə qarşı özünü müdafiə etməyə davam edir".

Bəyanatda Rusiyanın zərərli informasiya əməliyyatlarını davam etdirmək əvəzinə, Ukraynaya qarşı müharibəsinə son qoymalı olduğu bildirilir və Rusiyanın beynəlxalq səviyyədə tanınmış Ukrayna ərazisindən ordusunu tamamilə çıxarmalı olduğu vurğulanır.
Xatırladaq ki, mart ayında Rusiya hava məkanından gələn dronlar Estoniya, Latviya və Litvada qəzaya uğrayıb.

Hakimiyyət orqanları bu dronların Ukraynaya məxsus olduğunu və Rusiya hədəflərinə hücumlar zamanı marşrutlarından kənara çıxdığını təsdiqləyib.

Rusiya iddia edir ki, Latviya, Litva və Estoniya öz hava məkanlarını Ukrayna dronlarına açıb və xəbərdarlıqlara məhəl qoymadıqları təqdirdə qisas alacaqları ilə hədələyib.