Rusiya Müdafiə Nazirliyi ölkənin Belqorod vilayətində İl-76 təyyarəsinin qəzaya uğramasını terror aktı adlandırıb.

Bu barədə məlumatı Rusiya MN yayıb. 

“Kiyev İl-76 təyyarəsini vuraraq terror aktı törədib. Ukrayna Silahlı Qüvvələri təyyarəni Xarkov vilayətindən zenit-raket kompleksinin köməkliyi ilə vurublar. Rusiya Hərbi Kosmik Qüvvələrini radiolokasiya vasitələri tərəfindən iki Ukrayna raketinin buraxılması qeydə alınıb”, - deyə məlumatda qeyd olunub. 

Xatırladaq ki, bu gün Rusiyanın Belqorod vilayətində göyərtəsində ukraynalı əsirləri daşıyan “İl-76” təyyarəsi qəzaya uğrayıb. Ən son məlumata görə, hadisə zamanı 65 ukraynalı əsir, 6 ekipaj üzvü və 3 müşayiətçi həlak olub. Rusiya Dövlət Dumasının müdafiə komitəsinin sədri Andrey Kartapolov təyyarənin 3 raketlə vurulduğunu iddia edib. Ukrayna Müdafiə Nazirliyi hələ ki məsələ ilə bağlı rəsmi açıqlama verməyib.