“Bir məhsulun dadlı və bahalı olması məhsulun keyfiyyətli və sağlam olduğu anlamına gəlmir”.

Bunu "E-saglam.az" sağlamlıq və tibbi xəbərlər portalında təsisçi və Baş redaktor Könül Oruc qeyd edib. O, qiyməti baha, lakin ucuz tərkibli şokoladdan söz açıb:

“Son bir neçə ildir, məhsulların tərkibini oxumadan almıram. Bacardığım qədər yaxşı tərkibli məhsulları seçməyə çalışıram. Amma bazarda tərkibi yaxşı olan məhsul təəssüf ki, çox azdır.
Bir məhsulun dadlı və bahalı olması məhsulun keyfiyyətli və sağlam olduğu anlamına gəlmir.

Bazarda qiyməti və dadı ilə məşhur olan bu şokoladın tərkibində palma yağı var. Normalda yüksək qiymət məhsulun yağından tutmuş digər inqrediyentlərinə qədər daha keyfiyyətli seçimlərdən istifadə edildiyini göstərməlidir. Təəssüf ki, bu və ona bənzər bir çox başqa məhsullarda belə deyil. Hazırda satışda olan bir çox şokolad və qida məhsullarının əksəriyyəti palma yağı ilə hazırlanır.

Bu şokaladın 300 qramı 37 manatdır, 1 kiloqramı təxminən 123 manat edir. Bazar üçün olduqca yüksək qiymətdir. Amma tərkibi onu demir”.



Jurnalist bahalı qidaların belə tərkibinə vurulan ucuz palma yağının zərərlərini sadalayıb:

“Palma yağının zərərləri onun hansı hissədən əldə olunmasından asılıdır. Meyvədən alınan palma yağı nisbətən təhlükəsiz sayılır, amma ucuz başa gəldiyinə görə bir çox şirkət çəyirdəkdən alınan palma yağından istifadə edir. Çəyirdəkdən əldə olunan palma yağı yüksək doymuş yağ tərkibli olduğu üçün ürək-damar xəstəlikləri riskini artırır, pis xolesterolu yüksəldir və damarların sərtləşməsinə səbəb ola bilər. Üstəlik, yüksək temperaturda emal prosesi kanserogen maddələrin yaranma ehtimalını artırır.

Sonra deyirik ki, bu xəstəliklər niyə bu qədər artıb?!

Bahalı məhsulların tərkibinə ucuz inqrediyentlər əlavə etmək nə dərəcədə doğrudur?”, - deyə o sual edib.