Azərbaycan Respublikasının Prezidenti İlham Əliyev cənablarına
Surəti: Müdafiə Naziri cənab Zakir Həsənova
Tovuz rayonu, Dondar Quşçu kənd sakini İsmayılov Rəşadət Rahib oğlu tərəfindən

Möhtərəm Prezident!

Yazıb Sizə bildirirəm ki, mən 01 iyul 1988-ci ildə Tovuz rayonunun Dondar Quşçu kəndində anadan olmuşam və 01 iyul 2006-cı il tarixdə SHXÇDX Tovuz rayon şöbəsi (keçmiş Tovuz rayon Hərbi Komissarlığı) tərəfindən həqiqi hərbi xidmətə çağrılmışam. Hərbi xidmətdə olduğum vaxtlarda Tərtər rayonu ərazisində baş verən hərbi əməliyyatlar zamanı həm başımdan, həm də qolumdan güllə yarası alıb yaralandım. Hadisə baş verdikdən sonra, dərhal məni Tərtər rayonunun Sarıcalı kəndindəki səhiyyə müəssisəsinə aparırlar. Üç gün koma vəziyyətində qalsam da, bir həftə ərzində həmin səhiyyə müəssisəsində müalicə olundum. Bir həftədən sonra isə məni Gəncədəki hospitala apardılar və bu hospitalda 1 ay 10 gün müalicə olundum. Müalicədən sonra mənə 1 ay məzuniyyət verdilər və 54 gündən sonra xidmətdə olduğum hərbi hissəyə qayıtdım. Xidmətimi başa vurduqdan sonra, yəni 2008-ci ildə ordu sıralarından təxris olundum. Hərbi xidmət dövründə başımdan və qolumdan güllə yarası aldığımdan, səhhətimdə müəyyən problemlər əmələ gəlmişdi. Belə bir səbəbdən də, 2009-cu ildə pensiyaya çıxdım və 2009-cu ilin noyabr ayından 2021-ci ilə kimi pensiya aldım. 2021-ci ildə pensiyam dayandırıldıqdan sonra, Gəncə şəhər Abbas Səhhət adına 1 nömrəli şəhər xəstəxanasında, Maştağa qəsəbəsindəki 1 nömrəli Respublika Psixiatriya Xəstəxanasında və Qazax Rayonlararası Psixiatriya Xəstəxanasında 55 gün müalicə olundum. Adlarını çəkdiyim bu səhiyyə müəssisələrindən aldığım həkim rəylərini (epiqriz sənədlərini) Bakı şəhərində Əlillərin Bərpa Mərkəzinə təqdim etdim. Əlillərin Bərpa Mərkəzində həkim komissiyasının üzvləri sənədlərimə baxdılar və məni müayinə etdilər. Bütün bunlara baxmayaraq, sonda onlar mənə “imtina” cavabı yazdılar. Qeyd edim ki, mən ilk dəfə pensiyaya Müdafiə Nazirliyinin Baş Klinik Hospitalında (Papanin hospitalı kimi tanınır) Hərbi Həkim Komissiyasının qərarı ilə çıxmışdım. Hal-hazırda iki azyaşlı övladım var və qolum işləmədiyindən, iş qabiliyyətim məhdudlaşdığından, bu gün heç bir sahədə işləyə bilmirəm. Heç bir sahədən əlavə gəlir yerim də yoxdur. Özüm 3-cü qrup (Vəsiqə №204157) əliləm.

Bütün bunları əsas tutaraq yazıb Sizdən xahiş edirəm ki, üzüzə qaldığı belə bir problemin ədalətli araşdırılmasının həyata keçirilməsi, eyni zamanda aldığım pensiyamın bərpa olunması üçün aidiyyəti üzrə lazımi tapşırıqlarınızı verəsiniz. Mən sağlamlığımı həqiqi hərbi xidmət dövründə itirmişəm və ümid edirəm ki, mənim üzüzə qaldığım problem yaxın vaxtlarda öz həllini tapacaq.

Öncədən minnətdarlığımı bildirirəm.

İmza: İsmayılov Rəşadət Rahib oğlu